SABAT SA MGA KABUTIGAN SANG PRO-6 ANGOT SA MADINALAG-ON NGA REYD SANG NPA SA MAASIN

Published on 2017-06-19

Wala sang kamatuoran ang ginpangwakal sang mga matag-as nga opisyal sang PRO-6 nga kuno ginkuha sang NPA ang mga kwarta kag alahas sang mga pulis sang Maasin sa panahon sang reyd sadtong aga sang Hunyo 18, 2017. Sa pagpangusisa sa mga kaupod nga nagpatigayon sang operasyon, ginpanginwala nila nga may gindala nga kwarta ukon mga alahas halin sa istasyon. Indi man matuod ang ginahambal nga pagtapak sang NPA sa ulo sang mga ginpahapa nga pulis. Nahibal-an mismo sang mga naka-duty nga magluwas sa paggapos sa ila nga kamot para indi makabato, nangin tawhanon ang pagtrato sa ila sang NPA. Basi mas malala pa ang epekto sa ila sang sobra nga pagpangtamay ni Senior Superintendent Christopher Tambungan bisan nga yara pa sa state of shock ang iya mga tinawo.

Sala man nga hambalon nga pagpangawat ang ginhimo sang NPA bangud ang kinuha amo ang mga kagamitan militar nga ginagamit sang PNP batuk sa rebolusyonaryo nga hublag kag sa pumuluyo. Ang iban pa nga bagay nga di-hungod nga nadala kag mapamatud-an nga personal nga gamit igabalik sang NPA sa mga natungdan nga nagapanag-iya.

Ginapatihan sang NPA-Panay nga magahimo pa sang lain-lain nga estorya ang mga opisyal sang PRO-6 para tabunan ang kahuyangan sang ila kubay kag kapalpakan sang matag-as nga opisyal kag ang madinalag-on nga taktikal nga opensiba nga ini sang NPA. Anupaman, indi sini mabalewala ang kasadya sang madamo nga masa sa madinalag-on nga aksyon sang ila Hukbo. Sa bahin sang NPA, ginauyatan sini nga ang anuman nga hilikuton ang dapat magsabat sa interes sang masa, kag kon wala ang mabaskog nga suporta nila, indi maagum sang Hukbo ang kadalag-an sa mga pagpaninguha sini.

Sa pihak nga bahin, ginadayaw sang NPA-Panay ang disiplina sang mga Kaupod sa ila pagpaninguha nga malikawan ang maduguon nga engkwentro, pagseguro nga mapalayo sa katalagman ang mga sibilyan kag tawhanon na pagtrato sa mga nadakop nga pulis. Ginakilala man sang NPA-Panay ang husto nga desisyon sang mga naka-duty nga pulis nga indi na magbato sang makita nila nga kontrolado na sang NPA ang sitwasyon. Bangud sini, nalikawan ang kaswalti sa tinawo sang magtimbang nga bahin kag sa mga sibilyan sa palibot.

Ka Julio Montana
Tagapamaba
Coronacion Chiva “Waling-Waling” Command
New People’s Army – Panay Region